Səksəni adlayanların yarpaq tökümü

Payız mövsümünün ilk on günündə teatr, kino və musiqi sənətinin üç görkəmli siması dünyadan köçdü. Sanki təbiətin xəzan dövrünün başlaması ilə bərabər, incəsənət aləmində də bir “yarpaq tökümü” yaşandı.
Keçmiş SSRİ-nin və Rusiyanın məşhur teatr və kino xadimi, rejissor, ssenarist Mark Zaxarov sentyabrın 28-də 86 yaşında vəfat edib. Moskvadakı Lenkom Teatrının bədii rəhbəri, SSRİ Xalq artisti doğum gününə (13 oktyabr) iki həftə qalmış dünyasını dəyişib.
Mark Zaxarov
Görkəmli rejissor 1973-cü ildən baş rejissoru olduğu Lenkom Teatrında 38 tamaşaya quruluş verib. Onun ən məşhur rejissorluq işi “Yunona və Avos” rok-operası olub. M.Zaxarov Andrey Mironov və Anatoli Papanovun iştirakı ilə “12 stul”, “Məhəbbət formulu”, “Həmin Münhauzen” kimi populyar sovet filmlərinin də rejissoru olub.
Sovet kinosunun ən məşhur nümunələrindən olan “Mimino” filminin musiqisinin müəllifi, gürcüstanlı bəstəkar Qiya Kançeli oktyabrın 2-də ömrünü başa vurub.
Qiya Kançeli
10 avqustda 84 yaşını (1935) qeyd etmiş bəstəkar təkcə operaları və simfonik əsərləri ilə deyil, həm də teatr tamaşalarına və “Mimino”dan savayı “Kin-dza-dza”, “Qəm yemə” kimi filmlərə bəstələdiyi musiqiləri ilə də şöhrət qazanmışdı. SSRİ-nin Xalq artisti, Gürcüstanın Dövlət mükafatı laureatı idi.
Tbilisidə doğulan və orada konservatoriyanı bitirən bəstəkar, 1991-ci ildən Almaniyada, 1995-ci ildən isə Niderlandda yaşayırdı. Ömrünün son illərində vətənə qayıtmışdı.
Ötən əsrin 60-80-ci illərində “Çex bülbülü” kimi dünya şöhrəti qazanan çex estradasının əfsanəvi müğənnisi Karel Qott isə 80 yaşını bir neçə ay öncə – 14 iyulda qeyd etmişdi.
Karel Qott
Uzun illərdir leykemiya xəstəliyindən əziyyət çəkən sənətkar oktyabrın 2-də Praqada doğmalarının əhatəsində dünyasını dəyişib.
Yaradıcılığı boyu 1000-dək mahnı ifa etmiş müğənninin 300-ə yaxıb solo albomu işıq üzü görüb və dünyada təqribən 50 milyon diski satılıb.

Müəllif: CAVİD
Mənbə: medeniyyet.az

0 şərh