Yemək bişirmək bir sənətdir. Bu sənətin də müxtəlif növləri var. Bir çox xanımlar bu üsulları bilsələr də, bəzilərimiz yemək bişirməyin hansı üsullarının olduğundan xəbərsizik. Deyək ki, bu üsulları bilsək də, bəzən, yemək bişirmə prosesində səhvlərə də yol veririk. Bu yazıda çoxumuzun bilib səhv etdiyi, çoxumuzun isə ümumiyyətlə xəbərsiz olduğu yemək bişirmə üsullarından sizin üçün yazırıq.

Qaynatma üsulu ilə yemək bişirmək
Qaynatma üsulu ilə yemək bişirmək ərzaqların suda qaynama dərəcəsinə gətirilərək bişirilməsidir. Qaynadılma suyu su, ət, toyuq suyu və ya süd ola bilər. Burada 2 nüansa diqqət etmək lazımdır:
1. Ərzaqlar qaynar suya əlavə olunur və təkrar qaynama nöqtəsinə gətirilir, bişməyə davam edilir.
2. Ərzaqlar soyuq suya əlavə edilir, qaynadılır və daha sonra suyu azaldılır, bişməyə davam edilir.

Qaynatma üsulu ilə bişirməyin məqsədi ərzaqların qoxusunu qorumaq, həzmin asanlaşdırılması və qida dəyərləri baxımından güvənilən olmasıdır.

Zəif odda bişirmə üsulu
Bu üsulla kiçik hissələrə bölünmüş ərzaqlar az miqdarda su ilə və zəif odda bişirilir, həmin az su ilə də bişdikdən sonra servis edilir. Qida dəyərinin qorunması baxımından ən yaxşı bişirilmə üsuludur. Əsasən, qaz sobasında və ya sobada bişirilir. Bu üsulla mükəmməl istilik dərəcəsi qaz sobasında 82, sobada isə 170 dərəcədir.

Buxarda bişirmə üsulu
Ərzaqlar buxarda bişirilir. Bu üsulda qida dəyərinin itirilməsi az, həzm isə asan olur. Rəng və forma itirilmir, buna görə də, estetik cəhətdən çox gözəl görüntü olur. Buxarda bişirmək üçün geniş bir qabda su qaynadılır, onun üzərinə dəlikləri olan bir qab və ya buxar qabı yerləşdirilir, ərzaqlar da bu qaba qoyulur. Üzəri də qapaqla örtülür. Ərzaqlar yumşaqlaşana qədər bişirilir.

Sobada bişirmə üsulu
Burada ərzaqlar sobada bişirilir. Hər ərzağın bişirilmə dərəcəsəsi fərqlidir.

Qızartma üsulu ilə bişirmə
Ərzaqların sulu yağda və ya bitki yağlarında qızardılması üsuludur. Az və ya çox yağda qızartma olaraq iki yerə ayrılır. Qızartma qida dəyərinin çox itirilməsinə səbəb olduğu üçün ürək-damar xəstəliklərinin yaranmasına yol açır. Belə xəstəlikləri olan insanlar qızartma yeməklərdən uzaq olsalar yaxşı olar.