Qadın və kişi beyinləri
Deyəsən qadınların ailə həyatına bağlılığı və şıltaqlılığını onların heç də məhdud, zəif düşüncələri kimi başa düşmək düzgün deyil. Onlar dünyanın ən zərif və hissiyyatlı, pak və məkrli, sevinc və iztirabı vücudlarında yaşatmağı bacaran məxluqdur. Onlara qarşı son dərəcə nəzakətli, ehtiyatlı və həssas olmaq kişinin başlıca niyyəti olmalıdır.
Psixoloqlar sualı çox öncə özlərinə vermiş və xeyli götür-qoydan sonra maraqlı nəticələrə gəlmişlər. İo Durden və Dmana de Simonen «Cinsiyyət və beyin» adlı maraqlı kitab yazıb, Qərbdə çap elətdirmişlər. Həmin əsərdən qeydlərin oxuculara maraqsız olmayacağına əminik.
Ər-arvad üç il ərzində Amerika və Avropanı gəzib adamların beyni və əxlaqının tədqiqi ilə məşğul olan tanınmış alimlərlə görüşüb danışmışlar. Nəticə etibarilə bu müsahibələrə belə yekun vurulmuşdur: kişi və qadın beyinləri doğulan gündən bir-birindən fərqlənir.
Oğlanlara və qızlara hətta eyni cür oyuncaq verib, eyni cür geyindirsəniz belə, onlar elə olduğu kimi də qalacaqlar. Tədqiqatçıların gəldikləri nəticə belədir.
Beynin hipotalamus adlanan kiçicik bir hissəsi belə inkişafın əsasıdır. Kişi və qadınlarda bu hissə öz quruluşu və funksiyasına görə tamamilə fərqlidir.
Qadın beyni öz həcminə görə kişi beyni ilə müqayisəyə gəlməsə də, sən demə, o, daha «yaxşı qurulmuşdur»,- daha səmərəli işləyir və nəticədə kişi beynini xeyli geridə qoyur.
Belə «qeyri-bərabərliyə» dair bir neçə misal:
- öz məşhur intuisiyalarını qadınlar bioloji yolla, yəni beyinlə birlikdə irsən qəbul edirlər;
- qadınlar baxışları daha yaxşı «oxuyur» və həmsöhbətinin əl-qol hərəkəti və mimikasını (hətta qeyri-sərbəst) daha mükəmməl başa düşürlər;
- qadınlar daha həssasdırlar; onlar bir anda ətrafdakı adamların əhval-ruhiyyəsində dəyişikliyi sezir, hər bir yanlış məlumatı dərhal hiss edirlər;
- qadınlar dilçilikdə bir qayda olaraq kişilərə nisbətən daha bacarıqlıdırlar. Onların nitqi öz mürəkkəbliyi və bütövlüyü ilə fərqlənir. Onlar qrammatikada və xarici dilləri öyrənməkdə, elə mütaliədə də daha qüvvətlidirlər.
- Qadınlar həm də iy, səs və toxunmaya daha həssasdırlar. Onlar kişilərə nisbətən bu qıcıqlandırıcıların yaranması, yaxud dəyişməsinə tez reaksiya verirlər.
- Qadınlar kişilərə nisbətən bəzi yoluxucu formalara daha uğurlu müqavimət göstərə bilirlər.
Qadınlarda bu qəribə keyfiyyətlər heç də əbəs yerə yaranmamışdır. Buna səbəb beynin sol yarımkürəsinin daha çox inkişaf etmiş olmasıdır. O, dilə, qavramaya və görmə obrazlarının təhlilinə «rəhbərlik» edir.
Bütün bu sahələrdə qadının kişidən «ağıllı» olmasına səbəb nədir? Alimlər belə bir fikrə meyl göstərirlər ki, buna səbəb beyin gövdəsidir - o, qadınlarda kişilərdən fərqli olaraq daha qalındır.
Professor-sosioloq Maksimiana Zinovats deyir ki, kişilərin əksəriyyəti cinsi bərabərlikdən danışsalar da, əslində, nədənsə bu, görünmür.
Evlərin əksəriyyətində kişilər bu gün də ailə başçısı olaraq qalırlar. Demək olar ki, 80 faizə yaxın bütün mühüm qərarları o qəbul edir. Özünün inkişafdan qalmış sol yarımkürəsi ilə onun nə kimi qərarlar qəbul edə biləcəyini təsəvvür edirsinizmi?
13 şərh
Bir maraqlı fakt da odur ki kişilərdə seks mərkəzi(hipotalamus) və sevgi hissinə cavabdeh mərkəz ayrı-ayrı yarımkürələrdədir,amma qadınlarda isə onlar daha yaxındır bir-birinə.Ona görə qadınlar xəyanəti bağışlaya bilmir))) Kişilər isə bir qadını sevə-sevə başqası ilə asanlıqla sevişə bilər. Hamısında günahkar kişilərin beynidir.
Bağçada 50 günü analiz edəndən sonra alimlər baxıb ki,qızlar daha çox danışır,15 dəqiqə(oğlanlar isə 4 dəqiqə).Oğlanlar qızlara nisbətən 10 dəfə çox səs-küy salır və dalaşırlar. Böyük qadınlar telefonda eyni informasiyanı vermək üçün 20 dəqiqə verdikləri halda,kişilər 6 dəqiqə sərf edir.
Qadınlarda taktil hissiyat(toxunma) 10 dəfə çox yaxşı inkişaf edib. Ona görə qadınlar oxşanmaqdan,sığallanmaqdan çox xoşu gəlir.Qadınlar səsi 2.5 dəfə daha ucadan eşidir.
«Dünyada üç fəlakət var: yanğın, qadın və dəniz» — Ezop :)))
Kişi və qadın beyinlərinin fərqliliyindəndir ki, kişi ilə qadın bir çox hallarda bir-birlərini başa düşmürlər. Hətta adını tam xatırlamıram, bir şəxs demişdi ki, qadın kişini tam başa düşmək üçün gərək kişi ola, kişi isə əksinə. Bu da mümkün olmayacağına görə nəticə etibarı ilə dil tapmaq bəzən çətin olur. Amma, heç olmasa özünü onun yerinə qoyub, başa düşməyə çalışmaq, cəhd göstərmək də olar axı. Və yaxud da bir məsəl: biri od olanda biri su olar.