Etməgil I İmadəddin Nəsimi

Üzünü məndən nihan etmək dilərsən, etməgil!
Gözlərim yaşın rəvan etmək dilərsən, etməgil!

Bərgi-nəsrin üzrə mişkin zülfünü sən dağıdıb,
Aşiqi bixaniman etmək dilərsən, etməgil!

Qaşların qövsündə müjganın xədəngin gizləyib,
Ey gözü məstanə, qan etmək dilərsən, etməgil!

Canımı vəslin şərabından ayırdın, ey gözüm,
Eynimi gövhərfəşan etmək dilərsən, etməgil!

Qoymuşam eşqində mən kövnü məkanın varını,
Can nədir kim, qəsdi-can etmək dilərsən, etməgil!

Bürqəi üzündən açarsan məgər naməhrəmə,
Gizli əsrarı əyan etmək dilərsən, etməgil!

Yandırırsan önlümü eşqində, məlum oldu kim,
Ani risvayi-cahan etmək dilərsən, etməgil!

Doğruyam eşqində oxtək, kipriyin tanıq durur,
Qəddimi neyçün kaman etmək dilərsən, etməgil!

Çünki eşqin məskənidir könlümün viranəsi,
Həsrətə anı məkan etmək dilərsən, etməgil!

Çün yəqin bildi Nəsimi ağzının var olduğun,
Ol yəqini sən güman etmək dilərsən, etməgil!

4 şərh

ayxansevda
yəni indi nəsimini oxuyan var lap sevindim imtahanlar olmasa inanmıram ki filologiya fakültəsinin tələbələri də onu oxuya daha doğrusu söhbət klassik ədəbiyyatdan gedir
Cavid
Sizi bilmirəm ancaq biz o vaxt sevib oxuyurduq bele şeirləri)
Cavid
Daha doğrusu qəzəlləri)
ferid1001
Nesiminin ekser qezelleri gozeldi, bu da hemcinin +1