Uşaqlarınızı açıq havaya çıxarın

Uşaqların fiziki və psixoloji baxımdan sağlam ola bilməsi üçün hərəkətə, açıq havaya, günəşə ehtiyacları var. Mütəxəssislər bildirir ki, körpənin açıq havaya çıxarılması, günəş şüaları qəbul etməsi çox mühümdür.

Günəş şüası sümük və toxuma inkişafı üçün əhəmiyyətlidir. Uşaqlar açıq havada rahat oynayırlar. Onlar üçün açıq havada oynamaq böyük ehtiyacdır. Yazda açıq havada oynamağa daha çox can atarlar. Parklara, bağa qaçarlar.

İlk günlər çox vacibdir
Yenidoğulmuş körpədə xüsusilə ilk günlərdə hələ tərləmə funksiyası formalaşmadığı üçün mühit istiliyi 22-24 dərəcədən çox olarsa, bu, uşağa mənfi təsir edir. Bədən istiliyi də artanda uşağın həyati funksiyaları mənfi təsir görür. Buna görə körpələrin yay aylarında sərin yerlərdə saxlanması və otaq istiliyinin 23-24 dərəcəni keçməməsinə diqqət etmək lazımdır.

D vitamini qəbul etməlidir
Körpənin 1-12 aylığında sümük inkişafı üçün lazımlı olan D vitamini günəş şüalarının yardımı ilə bədəndə sintez edilir. D vitamini eyni zamanda immunitet sistemi üçün də lazımlı vitamindir. Bu vitamin həyatın ilk illərində uşağın sağlam böyüməsi üçün vacibdir. Hər gün yarım saat baş, qol və ayaqları çılpaq halda günəşə çıxarılan körpə yetərincə D vitamini qəbul etmiş olur. Pəncərə arxasından günəşləndirmək faydasızdır.

Zərərli günəş şüalarından necə qoruyaq?
Açıq rəngli geyimlər günəş şüalarının qarşısını alır. Uşağınız günəşli havada bayırda olacaqsa, günəş şüalarının zərərli təsirinə qarşı qoruyucu krem istifadə etmək lazımdır. Bu kremlər hər yaşdakı uşaq üçün istifadə edilə bilər, uşağın yaşı nə qədər kiçikdirsə, bir o qədər yüksək faktorlu qoruyuculu krem çəkilməlidir.

Uşaqlarınızı açıq havaya çıxarın
— Uşaqlar təmiz hava qəbul etməlidir.
— Uşaqlara istədikləri kimi hərəkət etmək imkanı təmin edir. Özgüvəni artırır.
— Öz səslərini istifadə etməkdə sərbəst olurlar. “Sakit dur, qonşu gələcək” kimi məhdudiyyətlər olmur.
— Təbiətdə olan canlı və cansız varlıqları oyunlarına qatarlar. Ağaclardakı quşlar, səmadakı günəş və buludlar kimi. Xəyal dünyasının inkişafı üçün lazımlı və faydalıdır.


Açıq hava oyun yerləri necə olmalıdır?
Uşaqların yaxşı hərəkətdə ola biləcəyi imkanlar yaradılmalıdır. Uşaqlar üçün güvənli, sərbəst bir ortam yaradılmalı və həmişə də diqqətdə saxlanmalıdırlar.

0 şərh