Bircə günüm olaydı...
BİRCƏ GÜNÜM OLAYDI...
Bircə günüm olaydı
Səhər tezdən yuxudan fikirsiz oyanaydım
Yenicə, təzə bir gün
Quşların sübh nəğməsi məni salamlayaydı
Günəş parıldayaydı dibçəkli pəncərəmdə
Oyadaydı sevinci kədərli gözlərimdə
Uca olaydı məqamım
Bir sürücüm olaydı
Ayaqqabıları tərtəmiz
Əynində uniforma
Bığları burma-burma
Səhər işə gedəndə bütün yollar mənimçün tamam boşaldılaydı
Mənə yol verəydilər
Cavanlar və qocalar
Qadınlar və uşaqlar
Məni salamlayaydı
Mənim ilk məhəbbətim onların arasından məni haraylayaydı
Bircə günüm olaydı...
O gün mənim xətrimə heç bir kəs dəyməyəydi
Qulağıma bəd ağızdan heç bir səs gəlməyəydi
Yuxu kimi gələydi mənə bütün məqamlar
Bu halımdan kim anlar
Sənin məndən uzaqlara qaçan şirin xəyalın
Səni mənə yasaqlar
O gün bütün işlərim mənim düz gətirəydi
Oyanaydı bu bəxtim birə yüz gətirəydi
Enməyəydim mən yerə
Doymayaydım uçmaqdan o mavi səmalarda
Çevriləydim mələyə
Şirin yuxu olaydım
Girəydim insanların həzin gecələrinə
Bircə günüm olaydı...
Ey mənim ölməz eşqim!
Qanadlanıb uçaydım bizim ulduzumuza
Qonaydım yolumuza
Axı de mənə hardasan?
Yoxsa sən də mənim kimi təkmisən
Bax burda mən gecikdim
Çünki sən bu yollardan artıq çoxdan keçmisən
Bircə günüm olaydı...
Günahsız ötüşəydim
Çoxdan görüşmədiyim ən əziz dostlarımın yadlarına düşəydim
Qayıdaydım o qəmsiz uşaqlıq çağlarıma
Anama gül verəydim, öpəydim yanağından
Yağaydı məhləmizə bəyaz qar gilələri
Yenə gələydi qulağıma qar topu oynayan dostlarımın səsləri
Sevincək tez geyinib ikibarmaq əlcəyimi
Qaçaydım məhləmizə
Qoşulaydım onlara
Keçən bütün günlərimi film tək izləyəydim
Məktəbin həyətində səni yenə gözləyəydim
Gələydin sən qarşıdan
Qəlbimdə eyni hisslər, yenə eyni həyəcan
Yenə də ana dili dəftərimin arxası
Dolaydı şeirlərlə
Mənə aid sirlərlə
Bircə günüm olaydı...
Mənim günüm olaydı
Ura deyib qaçaydım lalələrin içində sevincək uşaq kimi
Güləydi hey gözlərim
Həyat dediyin nədir ki?! Öləndə ağlayırlar
Doğulanda gülürlər
Amma, çox-çox heyf ki,
Mənə o bircə günü də nədənsə çox görürlər...
Müəllif: RƏFSAN
0 şərh