Kayzen

Şirin saqqız — Bütün şəkərli qidalar, xüsusilə də daha uzun müddət çeynəndiyi üçün şirin saqqızlar dişlərin çürüməsinə səbəb olur.

Butulka qapağı açmaq — Dişlərinizlə şüşə qabların qapaqlarını açmayın. Bu yanlış vərdiş dişlərinizdə çatlar yarada bilər.

Energetik içkilər və meyvə suları — Energetik içkilər və meyvə sularının tərkibindəki şəkər və xeyli miqdarda vitamin diş minasına ziyandır. Buna görə də sıxılmış təzə meyvə suyu içmək daha məqsədəuyğundur.

Qələm çeynəmək - İş stressindən, ya da gərginlikdən qələmin başlarını çeynəmək dişlərə ciddi zərər verir.

Qəhvə və siqaret — Qəhvə içmək və siqaret çəkmək tədricən dişlərin rəngini dəyişməsinə və saralmasına səbəb olur. Siqaret kimi digər tütün məmulatları da dişlərinizdə ləkələnmə və diş əti xəstəliklərinin yaranmasına gətirib çıxarır. Tütündən istifadə, eyni zamanda, ağız xərçənginə yol aça bilər.

Tum çırtlamaq - Tum çırtlayarkən tumların qabıqları dişarası boşluqlara girərək diş və diş ətinə ziyan verə bilər.

Dişləri qıcamaq - Dişləri qıcamaq zamanla dişlərə ziyan verəcək ağrılara səbəb olur.
Davamı →

Bu gün müasir stomatologiyada hamiləlikdə yaranan ağız boşluğu problemləri və onların həlli üsulları önəmli yer tutur. Günümüzün şərtlərində uşaq sahibi olmağı düşünən şəxslərin diqqət etməsi lazım olan bir çox ünsürlər vardır. Hamiləliyin əvvəlində fol turşusu əsaslı, hamiləlikdə isə Ca, Mg və s. minerallarla zəngin həblərin dölə və anaya müalicəni davametdirici məqsədlə tövsiyəsi aktual məsələlərdəndir. Bütün bu kompleksləri təbii qidalarla və bitki mənşəli həblərlə əvəz etmək heç də pis olmazdı. Çünki mineral balansın pozulması bilavasitə ana namizədə stomatoloji problemlər yaradacaq. Bunun üçün də ilk növbədə hamilə xanım detallı stomatoloq müayinəsindən keçməlidir, diş əti, selikli qişada olan problemlər öyrənilməlidir. Bundan sonra isə kariyesli, pulpitli və periodontiti olan dişlər və iltihabı olan diş əti müalicə edilməlidir. Müalicənin taktikasında təcili olmayan cəhdlər, məsələn, estetiklik və s. doğum sonrasına da buraxıla bilər.

Hamiləlikdə hormonal disbalans nəticəsində diş ətində “hamiləlik gingiviti”, yəni diş ətinin yayılmış iltihabi xəstəliyi çox müşahidə olunur. Bu zaman diş ətində tünd qızartı, ağrılar, keyimə hissi və qanamalar olur.

Qanamalar fırçalama zamanı daha da artır. Bu da hamilə xanımın bu proseduru yarımçıq kəsməsinə gətirib çıxarır. Gingivit artdıqca normal diş əti cibləri dərinləşir. Bura toplanan mikroblar (stafilokok, streptokok, aktinomiset, kandida göbələkləri) güclü qoxu yaradır və kariyoz proseslərə stimulyasiya verir. Bu bakteriyaların qana keçməsi anaya və inkişaf edən dölə nəzərəçarpacaq dərəcədə təsir edir.

Kariyoz proseslərin hamiləlik zamanı artmasını əvvəllər Ca2+ ionunun çatışmazlığı ilə əlaqələndirirdilər. Aparılan araşdırmalar bunun normal Ca həbi qəbul edən xanımlarda da olduğunu göstərir. Bu gün tibdə bu problemin əsas səbəbinin qalxanabənzər vəzin arxasında olan paratiroid vəzlərdə olduğu tapılıb. Bu düyü həcmində olan vəzlərin hormonu parathormon qanda kalsiumu sümüklərdən və dişlərdən ayırmaq hesabına artırır. Bunun nəticəsində dişlərdə destruksiya gedir, mikroflora isə kariyoz prosesə təkan verir. Eləcə də II-III trimestrlərdə intensivləşən gəyirmə və qusmalar zamanı mədə və onikibarmaq bağırsaq mühitləri (ferment və HCl) ağız boşluğuna evakuasiya olunur. Bu da mina qatında hidroksiapatitlərin dağılmasına səbəb olur. Bunun üçün xanımlar maarifləndirilməlidir. Gəyirmə və qusmalardan sonra ağız boşluğu ya ilıq su ilə, ya da müalicəvi Teasept çayı ilə mütləq yaxalanmalıdır.

Ardı →